Sevme qelbi koru, ürek Şiiri - Sevinc Ar ...

Səni vaxtsız ölüm çəkdi,
Gecə-gündüz zülm çəkdin.
Dörd tərəfin hörümçəkdi,
Görməyirsən toru, ürək.

Dərdlə qəmin arasında,
Qan laxtalar yarasında,
Yad başının çarasında,
Sən özünü qoru, ürək.

Meylini heç bicə salma,
Axmaq, avam, gicə salma
Özünü çox gücə salma,
Qaldırmazsan zoru, ürək.

Qismətində dərdin çoxu,
Kələfindən kəfən toxu.
Oxuyursan, solo oxu,
Neyniyirsən xoru, ürək.

Ayrılığın baxşı sına,
Qəm ilməli naxşı sına.
Sən də vurul yaxşısına,
Sevmə qəlbi koru, ürək.