Sevgisi var Şiiri - Sevinc Arzulu

Kişinin sol getməyə daima meyli olur,
Görəsən bu gedişin kimə nə xeyri olur.
Hər qadın başa düşməz, dilləri qeyri olur,
Kişilərin üzündə xəyanət cizgisi var.

Bir az uzaq dolan gəz, sən ey qapımı pusan,
Həqiqətin önündə kimsə deyil ki susan.
Qadınını aldatmaq bəlkə asandan asan,
Ədalətin əlində həqiqət güzgüsü var.

Acı çəkən simanı zərif qırış naxışlar,
Dumduru gözlərindən yağar isti yağışlar.
Ona xəyanət edən kişini də bağışlar,
Qadının ürəyində nə boyda sevgisi var.
25.04.2019