Seslin olaram Şiiri - Sevinc Arzulu

Zaman pəncərənin alt şüşəsində,
Ünvanlı,ünvansız məktublar yazır.
Güman şəcərəmin üst guşəsindən,
Gözlə görünməyən quyular qazır.

Yaranıb xilqətin bir zərrəsindən,
Qapqara dünyanın qoynuna düşdüm.
Yorulub həsrətin mənzərəsindən,
Amansız fələyin oynuna düşdüm.

Udan fələk olar, uduzansa mən,
Mən necə kədərə təslim olaram?
Taleyin püşkündə yer qazansam mən,
Könüllər odlayan səslin olaram.