Sensiz ürek Şiiri - Sevinc Arzulu

Ay sevgilim, ver əlini.
Qaraltmayaq nur selini.
Məhəbbətin gur telini
Hörməyir ki sənsiz ürək.

Nədir hicrin özəlliyi,
Bəlkə payız xəzəlliyi?
Bunca yaşıl gözəlliyi
Görməyir ki sənsiz ürək.

Açmayır qızılgül kolu,
Xar alıbdır sağın-solun.
Vəslə doğru gedən yolu,
Yormayır ki sənsiz ürək.

Nədir hicrin layihəsi?
Ətirli eşq rahiyəsi.
Xoşbəxtliyin qafiyəsin,
Sormayır ki sənsiz ürək.

Ayrılığın addım səsi,
Məhəbbətin önün kəsir.
Külək kimi yaman əsir,
Durmayır ki sənsiz ürək.

Allah, dilləndir lalını,
Soruşum hal-əhvalını.
Xoş günlərin xəyalını,
Qurmayır ki sənsiz ürək.

Arzusuna çatıb gülüm,
Dərd-qəmini atıb gülüm.
Əbədilik yatıb, gülüm
Vurmayır ki sənsiz ürək.
01.11.2017