Sensiz darıxıram Şiiri - Sevinc Arzulu

De, hardasan qara gözlüm,
Burda sənsiz darıxıram.
Qayıt mənim şirin sözlüm,
Yurda, sənsiz darıxıram.

Göy səmada şimşək çaxmaz,
Günəş təbəssümlə baxmaz.
Lal dayanar sular, axmaz
Gur da, sənsiz darıxıram.

Sevgi yüzümü bəzəsin,
Güllər düzümü bəzəsin.
Qayıt, üzümü bəzəsin,
Nur da, sənsiz darıxıram.

Sönməz közümü tapıram,
Səbr, dözümü tapıram.
Sanki özümü tapıram,
“Şur”da , sənsiz darıxıram.