Seni soraqlaram Şiiri - Sevinc Arzulu

Mən ki dəyişmədim, həmən-həmənim,
Nədən cücərmədi görən səmənim.
Sükuta qərq olub yaşıl çəmənim,
Qırmızı geyinən lalələr dizdən.

Gəmim uzaqlaşıb, qayıq gəlməyir,
Ayrılıq sərxoşdur, ayıq gəlməyir.
Daha heç bəxtimə yavuq gəlməyir,
Üzüb ayağını vüsalın bizdən.

Al-əlvan geyinməz düzlərim, dostum,
Sənə yetişməyir sözlərim, dostum.
Çoxdandır görməyir gözlərim, dostum,
Səni soraqlaram ləpirdən, izdən.