Şen bu gece Şiiri - Sevinc Arzulu

Həsrətimdən rəngin solsa,
Qara gözün yaşla dolsa,
Gülüm, gizlicə də olsa,
Görüşə gəl sən bu gecə.

Qəlbə daman olacaqdır,
Hava duman olacaqdır,
Bizə mehman olacaqdır,
Külək, çiskin, çən bu gecə.

İşim olub yaman müşkül,
Dağılıbdır vüsal köşkü.
Gəlsən edəcəyəm təşkil,
Şeir axşamı mən bu gecə.

Könlümü qəm alacaqdır,
Əbədilik qalacaqdır.
Hicran çətin salacaqdır,
Saçlarıma dən bu gecə.

Həmişə qəmli Sevinci,
Gözləri nəmli Sevinci,
Kədər aləmli Sevinci,
Görəcəksən şən bu gecə.