Sazdı, Sevinc Şiiri - Sevinc Arzulu

Billurdan sarayın vardır,
Gülüşdən harayın vardır.
Fəxr edirsən çayım vardır,
O da çox dayazdı, Sevinc.

Dərdin xəmri sıyıq olar,
Qurdun evi oyuq olar.
Tənha gəzmə, soyuq olar,
Hər tərəf ayazdı, Sevinc.

Bax telini yolanlara,
Vaxtlı-vaxtsız solanlara.
Haqq edirsən olanlara.
Sənə bu da azdı, Sevinc.

Dağdan asılı tülləri,
Açacaqdır ağ gülləri.
Tanrının məlhəm əlləri,
Taleyini yazdı Sevinc.

Günəş yenə nurun saçmış,
Qaranlıq uzağa qaçmış.
Üzündə çiçəklər açmış,
Deyən keyfin sazdı Sevinc.