Sarı gelin Şiiri - Sevinc Arzulu

Sönüb. Alışmaz közlər,
Qəm görməz ala gözlər.
Sənin yolunu gözlər,
Bağların barı,gəlin.
Sarı gəlin.

Nə gözəldir gen düzən,
Əlvan geyinib bəzən.
Sən ol mahir bir tarzən,
Dilləndir tarı, gəlin.
Sarı gəlin.

Çəmən yamyaşıl geyər,
Bənövşə boynun əyər.
Səni görcək əriyər,
Dağların qarı gəlin.
Sarı gəlin.

Sel gələr uca dağdan,
Rəngi lillənmiş ağdan.
Dər əlinlə budaqdan,
Heyvanı, narı gəlin.
Sarı gəlin.

Cücəribdir səmənim,
Lalə, nərgiz çəmənim.
Yazığın gəlsin sənin,
İncitmə yarı, gəlin.
Sarı gəlin.