Sarar meni Şiiri - Sevinc Arzulu

Haqqım vardır öyünməyə,
Fərəh ilə böyünməyə.
Tanrım, qoyma bölünməyə
Qəm qılınc tək yarar məni.

Araz kimi durularam,
Obamıza burularam
Fərəhdən heç yorularam?
Kədər, qüssə yorar məni.

Qurulubdur belə bəşər,
Yarı xeyir, yarı da şər.
Düşmənlərim itkin düşər,
Qəlb dostlarım arar məni.

Bu dünyada ədalət var.
Zirvəni fəth eyləməz sar.
Geri dönsə naxələf yar,
Görən kimdən sorar məni.

Yada düşər köçənlərim,
Əcəl suyu içənlərim.
Dərd zəmisin biçənlərim,
Acı duyğu sarar məni.