Salam, doğma mektebim Şiiri - Sevinc Arzulu

Salam doğma məktəbim,
Salam əziz məkanım.
Uzaqlara yayılıb,
Bu gün şöhrətin-şanın.

Yüz iyirmi beş il keçib,
Təməlin qurulubdur.
Eh, neçə fəsil keçib,
Lal sular durulubdur.

Biz də sənin qoynunda,
Böyüyüb boy atmışıq.
Zamanın sərt oynunda,
Arzu-kama çatmışıq.

Hər yanda tanış izdir,
Çalınıb çox qələbə.
Müəllimlər əzizdir,
Doğmadır hər tələbən.

Qırx dörd il bundan əvvəl,
Qurtarmışam məktəbi.
Təhsil alaraq açdım,
Bir çox gizli mətləbi.

Böyüyüb, yaşa dolub,
Gerçək olub xəyalı.
Sənin məzunun olub,
Neçə-neçə ziyalı.

Hər qapını açanda,
Həyəcandan əsirəm.
Güllər ətir saçanda,
Görüşə tələsirəm.

Hamı əlvan geyinib,
Sanki yallı gedirik.
Şanlı yubileyini,
Sevinclə qeyd edirik.

Rəvan olar bal təbim,
Şəninə sözlər seçsə.
Var ol doğma məktəbim,
Neçə əsr də keçsə .