Şair Şiiri - Sevinc Arzulu

Qanadını pisə gərmə,
Qarşısına süfrə sərmə.
Səmanı kimsəyə vermə,
Yer-göyü böldürmə, şair.

Mən də sənin bacın, billəm,
Vardır ehtiyacın, billəm.
Bitməz ağrın-acın, billəm,
Özünü öldürmə, şair.

Nisgilin çoxdur dünündə,
Qəm duyular şən ünündə.
Əyilmə düşmən önündə,
Dərdini bildirmə, şair.

Yaz həsrətin çarasından,
Vüsalın zərxarasından.
Adamların arasından,
Adını sildirmə, şair.

Ona-buna şər atana.
Min cür günaha batana.
Söz söyləmə şarlatana,
Dünyanı güldürmə, şair.