Riyanın boyağı Şiiri - Sevinc Arzulu

Sahilidir qayalıq,
Nədən coşur bu dəniz.
Hicrin gözün oyarıq,
Sən və sadiq bəndəniz.

Bəzən bir həqiqətin,
Önündə lal oluruq.
Duyanda məhəbbəti,
Qəmli xəyal oluruq.

Eh, güldürə bilməz ki
Kimsələr üzümüzü.
Ürək edib silməz ki
Yalanlar düzümüzü.

Qapımızın önündə
Həsrət növbətçi durar.
Ömrün qara günündə
Riya da min tor qurar.

Tora düşər sadəcə
Riyadan uzaq olan.
Vücudu böyüsə də,
Qəlb ilən uşaq olan.

Ümidin ayağından,
Daim çəkən biri var.
Riyanın boyağından,
Yaranmış üz kiri var.

Necə yaddan çıxardaq,
O amansız birini.
Eh, ölünü qoyaraq,
Ağladacaq dirini.