Qurban olum Şiiri - Sevinc Arzulu

“Eh”-in duman,çənim olsun,
Seyfin mənə qənim olsun.
Sağdakılar sənin olsun,
Sollarına qurban olum.

Göydən yağış tək tökülən,
Dən tək biznesə əkilən.
Çeklərin üstə çəkilən,
Qollarına qurban olum.

Sən inan birüzlüyümə,
Saflığıma,düzlüyümə.
Sənin o şax yüzlüyünə,
Dollarına qurban olum.

Dolları tez-tez ötürən,
Manatı mənə yetirən.
Həmişə səni gətirən,
Yollarına qurban olum.

Çox puldan başın itirər,
Qəpiyi yerdən götürər.
Üstündə avro bitirən,
Kollarına qurban olum.