Qoru, Allah Şiiri - Sevinc Arzulu

Haqq işini ürək bilsuin,
Nə hiylə, nə kələk bilsin.
Əyriləri fələk bilsin,
Sən düzləri qoru, Allah.

Bir kimsəyə baş əymərik,
Nə də ki xətrə dəymərik.
Yalandan köynək geymərik,
Xoş üzləri qoru, Allah.

Bax, səngərdir gecə-gündüz,
Dərə, təpə, çəmən, dağ-düz.
Ordumuz səf olub yüz-yüz,
Sən yüzləri qoru, Allah.

Günəş Yerə nurun ələr,
Şaqraq axar şəlalələr.
Düzü bəzər tər lalələr,
Nərgizləri qoru, Allah.

Göydən yenə alov yağır,
Şəhid yükü yaman ağır.
Açdım neçə-neçə cığır,
Sən izləri qoru, Allah.

Hanı gözəl, məsud anlar,
Köçüb getdi neçə canlar.
Dalğalanar okeanlar,
Dənizləri qoru, Allah.

Baş əyirik fərmanına,
Möhtacıq dərd dərmanına,
Əl açıram dərgahına,
Sən bizləri qoru, Allah.