Qoca çağında Şiiri - Sevinc Arzulu

Zamanın gözünə ayna həyatım,
Oduna-közünə oynar həyatım.
Elə öz-özünə qaynar həyatım,
Bu zalım dünyanın ocaq çağında.

Uzağam zəhərin ziyan anından,
Sazağam qəhərin biyabanından.
Yol salıb şəhərin xiyabanından,
Keçdim gəncliyimin qoçaq çağından.

Səslərəm, hayıma heç dünüm yetmir,
Kitabın sonuna bir günüm yetmir.
Nə əlim çatmayır, nə ünüm yetmir,
Neynəyim ömrümün qoca çağında.