Qemden savayı Şiiri - Sevinc Arzulu

Gözümdə göz yaşı dayanmaz daha,
Qəlbimdə məhəbbət oyanmaz daha.
Təbiət min rəngə boyanmaz daha,
Bir kimsəm yox mənim qəmdən savayı.

Üzümə gülənin üzünü gördüm,
Beşini, onunu,yüzünü gördüm.
Güzgüdə ölümün özünü gördüm,
Nə artdı saçımda dəndən savayı.

Həsrətindən bağrım olubdur şan-şan,
Ülkər ulduzuyam göydə sayrışan.
Seyincəm, gəzirəm halı pərişan,
Dərdimə kim yanar səndən savayı.