Qem yükü Şiiri - Sevinc Arzulu

Bu dünyanın qəm yükünü
Şal təkin çiynimə saldım.
Bulud təkin nəm yükünü,
Axıtdım, beynimə saldım.

Üzüldümmü? Bilmirəm ki
Dəli eşqin həsrətindən
Nəyə gərəkdir o qəm ki,
Doğulubdur kin-nifrətdən.

Indi daha acığımı,
Qardan, yağışdan alıram.
Xatırlayıb gənc çağımı,
Soyuq baxışdan alıram.

Qaynamayır qaşın-gözün,
Min il qocalıb durmusan.
Qurtarıb söhbətin-sözün,
Çay önündə bənd qurmusan.,

Baxıram qurduğun bəndə,
Sel gələrsə uçacaqdır.
Allahın sevdiyi bəndə,
Torpağını qucacaqdır.