Qelebe rengi Şiiri - Sevinc Arzulu

Təbəssüm oyanar hüsn-camalında,
Kişilik dayanar and-amalında.
Hər bir qəhrəmanın xoş xəyalında,
Qıy çəkər Koroğlu, səslənər Cəngi.

Uzaqdan düşmənin əksi görünür,
Məğlubdur.Bayrağı yerlə sürünür.
Hər tərəf al-əlvan rəngə bürünür,
Günəşlə bir vurur qəlbin ahəngi.

Girsə də neçə cür saxta boyağa,
Türk oğlu türkəm mən.Sərvaxt,oyağam.
Daha qalxa bilməz düşmən ayağa,
Dağılıb tifağı,əzilib əngi.

Ilahi hər zaman türkə yar olsun,
Türk eli azad və bəxtiyar olsun.
Dünya sevincimdən xəbərdar olsun,
Sevgiylə çalınır məbədin zəngi,

Sarı bülbül kimi şövq ilə ötək,
Xarı bülbül kimi Şuşada bitək.
Bürüyüb aləmi göy qurşağı tək,
Zəfər bayramının qələbə rəngi.