Qefilden Şiiri - Sevinc Arzulu

Tanrının gündüzündə,
Lalə yığdım düzündə.
Elə bil göy üzündən,
Ulduz düşdü qəfildən.

Nağılın yüyrəyinə,
Ürəyin köyrəyinə.
Maralın ürəyinə,
Ağ duz düşdü qəfildən.

Gələn pay qurtarmamış,
Qaynar çay qurtarmamış.
Isti yay qurtarmamış,
Payız düşdü qəfildən.

Al geyinib sən bəzən,
Aşiqin qəlbin əzən.
Yarından ayrı gəzən
Yalqız düşdü qəfildən.

Başqa bir ad daşıma,
Çiynində yad daşıma.
Nədənsə yaddaşıma,
O qız düşdü qəfildən.