Qebrimde Şiiri - Sevinc Arzulu

Gözəldir şer guşəsi də,
Almazdır qəlb şüşəsi də..
Baharın bənövşəsi də,
Yazda bitəcək qəbrimdə.

Dərd oynar qəm donundaca,
Beşindəcə, onundaca.
Gəlib-gəlib sonundaca,
Kölgə itəcək qəbrimdə.

Qızılgülü yarı bilib,
Tikanını xarı bilib.
Sevgili dildarı bilib,
Bülbül ötəcək qəbrimdə.

Göz yaşını dostum silə,
Arzularım gəlməz dilə.
Ruhum ana torpaq ilə,
Vəslə yetəcək qəbrimdə.