Qeder qarışıq Şiiri - Sevinc Arzulu

Sevdim səni gözlərində qüssə, kədər qarışıq,
Şükür etdim taleyimə qismət, qədər qarışıq.

Nə edim ki sonunacan birləşmədi yolumuz,
Içimdə bir boşluq vard;r heyif, hədər qarışıq.

Bahardan vaxt almışdıq biz vüsal gününə kimi,
Payızla qış birləşərək borcu ödər qarışıq.

Duyğularım, fikirlərim nizam-nizam düzülməz,
Burda mənim günahım yox, fələk edər qarışıq.

Göy səmada birləşibdir Şimal-Cənub küləyi,
Fırlanıban burular hey göylə gedər qarışıq.

Yolun düşsə, ay əzizim,əgər gülli-gülzara,
Qızılgülü yasəmənlə, nərgizlə dər qarışıq.