Qatarda qalıb Şiiri - Sevinc Arzulu

Qarası bəbəyimin,
Ətiri çiçəyimin.
Neynəyim, taleyimin
Əli çidarda qalıb.

Yoldaş olum mələyə.
Məni nura bələyə.
Yetəmmirəm köməyə,
Sevdiyim darda qalıb.

Mavi sətirli mahnım,
Çiçək çətirli mahnım.
Bahar ətirli mahnım,
Boranda, qarda qalıb.

Sökülməyincə danım,
Sıxılacaqdır canım.
Görəsən görüş anı,
Hardadır, harda qalıb.

Məndən nə küs, nə inci,
Mən dostların ən dinci.
Ürəyimin sevinci
Gedən qatarda qalıb.