Qara tale Şiiri - Sevinc Arzulu

Istəməm xəyalın ümidsiz olsun,
Günəşin istisi bəyaz bələyi.
Göy səma tərtəmiz, buludsuz olsun,
Daim qanad çalsın sevgi mələyi.

Bu baxça mənimdir, nübar bar sənin,
Çox yağıb telinə bəyaz qar sənin.
Boynumda nə qədər haqqın var sənin,
Bilirəm, azalmaz məndən gileyin.

Fərəhi qapıdan ötürmə, nolar,
Həsrəti özünə götürmə, nolar.
Heç zaman gücünü itirmə, nolar,
Əyilməz olsun qoy möhkəm biləyin.

Ruhumun dörd yanı masmavi sudur,
Istəsə məni də anında udur.
Allahdan təkcənə umudum budur.
Yerinə yetsin kaş hər bir diləyin.

Zaman xalısında ilmədik, dostum,
Qaranı pozub da silmədik dostum.
Qaydanı-qanunu bilmədik,dostum,
Uduzduq oynunda qara taleyin.