Qaldıq Şiiri - Sevinc Arzulu

Özümlə götürüb alagöz yarı,
Dedim xoşbəxt olaq bir anlıq barı.
Sandıq yol gedirik bahara sarı,
Sonunda payızla üz-üzə qaldıq.

Söylədim yolunu bir bizlərdən sal,
Bir kəlmə demədi, sanki oldu lal.
Bizdən üz döndərdi vəfasız vüsal,
Həsrətin özüylə göz-gözə qaldıq.

Nəfəs də almağa vermədi imkan,
Heç əskik olmadı qasırğa, tufan.
Atəşsiz, alovsuz yandırdı hicran,
Yenə sevdiyimlə köz-közə qaldıq.