Peşimanam Şiiri - Sevinc Arzulu

Dalğa olsam,dənizlərdə uyardım,
Sularında dərdlərimi yuyardım.
Pis adamı ilk baxışdan duyardım,
Peşimanam,peşimanam,peşiman.

Alışdıra bilməyəcəm közümü,
Ağlamaqdan kor etmişəm gözümü.
Kimə deyim dərd-sirrimi,sözümü
Peşimanam,peşimanam,peşiman.

Dostlarımın Kə`bəsiyəm,piriyəm,
Sanırlar ki ölməmişəm,diriyəm.
Mən ki mə`nən ölmüşlərdən biriyəm,
Peşimanam,peşimanam,peşiman.

Dünya özü boyda riya,yalanmış.
Verdiyindən on qat artıq alanmış.
Qəlb sarayım neçə ildir talanmış,
Peşimanam,peşimanam,peşiman.

Sevinc daim xəyallara dalandı,
Həyat puçdur,şeirlərsə qalandır.
Dəli könlüm atəşlərə qalandı,
Peşimanam,peşimanam,peşiman.