Özümden qabaq Şiiri - Sevinc Arzulu

Bir gələn yox canım, üzü bəriyə,
Qanayan yaramı bəlkə səriyə.
Nə qaldı a dostum, səndən geriyə,
Xatirən ölübdür özündən qabaq.

Surətin gözümdən bir an getməyir,
Könlümün dediyin fələk etməyir.
Iradəm çatsa da gücüm yetməyir,
Dostum, səbr gəlir dözümdən qabaq.

Gah Ay tək səmadan mənə baxırsan,
Gah da şimşək olub qəfil çaxırsan.
Elə yandırırsan, elə yaxırsan,
Ürəyim alışır közündən qabaq.

Dağlardan qara yel əsər, bilirsən,
Köksümdə sarı tel əsər. Bilirsən.
Qarşımı qayalar kəsər, bilirsən
Laləli-nərgizli düzündən qabaq.

Duyğular çuğlaşar lap cəng şəklində,
Qayğılar dalaşar pələng şəklində.
Düz yüz bir gül gələr çələng şəklində,
Gözümün yaşının yüzündən qabaq.