Ötür meni Şiiri - Sevinc Arzulu

Mənə varlığı yetməyir,
Ürəyimdən yar getməyir.
Bilirsən, buhuş etməyir.
Hər rayihə,ətir məni.

Göy buludlar,baxın, gedir,
Xatirələr axın edir.
Sənə yaman yaxın edir,
Yazdığım hər sətir məni.

Sinə gərdim sazaqlara,
Düşməm tələ-duzaqlara.
Yaman uçdum uzaqlara,
Özüməcə gətir məni.

Dərdə gözümü süzmüşəm,
Qəmə gül-çiçək düzmüşəm.
Yerdən əlimi üzmüşəm,
Səmayaca götür məni.

Oxuyurlar asta, pəsdən,
Diksinirəm gələn səsdən.
Müxənnətdən, həm nakəsdən,
Yarəb, özün ötür məni.