Ömür oldu Şiiri - Sevinc Arzulu

Qızıldan ləl tac idim,
Qaş-daşlara ac idim.
Bir yaşıl ağac idim,
Alışıb kömür oldum.

Kökdən düşübdür sazım,
Qalmayıb işvə-nazım.
Ah, nədən alın yazım,
Yarımçıq ömür oldu.

Ay dərdi-qəmi atan,
Tez oyanıb gec yatan.
Qulaqlarıma çatan,
Səs oldu, səmir oldu.

Könlüm yaman atlandı,
Səmaya qanadlandı.
Sanırdım poladdandandı,
Paslanan dəmir oldu.

Göz yaşımı mən silim,
Bəmdən bəm oldu zilim.
Axırda son mənzilim,
Doğma Kürdəmir oldu.