Olmayaydı kaş Şiiri - Sevinc Arzulu

Uzanı qalıb qolları,
Solub bənövşə kolları.
Görürsənmi o yolları,
Kəndimizə gedir birbaş.

Gözlə, vüsal sətri gəlir,
Başı üstdə çətri gəlir.
Burnuma ot ətri gəlir,
Külək əsir yavaş-yavaş.

Söküldü eşq tərsanəsi,
Büküldü eh, tərs xanəsi.
Ötənlərin təranəsi,
Haralarda qaldı qardaş.

Nə düşməni dost sanıram,
Nədə varlığın danıram.
Yadıma salıb anıram,
O günləri gözümdə yaş.

De, hardasan qədər yazan,
Sevinc sözün hədər yazan.
Bəxtimizə kədər yazan.
Ayrılıq olmayaydı kaş.