Olayım Şiiri - Sevinc Arzulu

Darda dayaq qardaş-bacı,
Onlar başımızın tacı.
Nəyə lazım ağrı-acı,
Şirin-şəkər təm olayım.

Mən qurbanam şirin dilə,
Göz yaşımı sözlə silə.
Ay ürək, qalxmayaq zilə,
Yerə enib bəm olayım.

Ədalətin Leylası yox,
Zümzüməsi, laylası ox.
Qara gözün sevdası çox,
Ala gözdə nəm olayım.

Mizrab gedər tar uğrunda,
Bulud ağlar qar uğrunda.
Bir naxələf yar uğrunda.
Həm öləyim, həm olayım.

Gəzək-görək, səfa tapaq,
Dost-tanışda vəfa tapaq.
Yarəb, nolar, şəfa tapaq,
Ağrılardan kəm olayım.