Ol melek-sima Şiiri - Şair Hayali 2

Ol melek-sîmâ perî kim benzemez insân aña
Cân ile dilden fedâ olsun hezârân cân aña

Ey felek dervâzesin açma dem-i subhun sakın
Bir gece ger sarılam ben hasta-dil uryân aña

Gerdenine hâleyi tavk eyledi uşşâk-vâr
Boynu baglı bir kul olmuştur meh-i tâbân aña

Gülşen-i derdin nihâlidir bu cism-i nâ-tüvân
Meyvedir bagrım başı berg oldu her peykân aña

Gördü ekdim mezra’ı dilde mahabbet dânesin
Dûd u âhım ebr olup yagdırdı çok bârân aña

Dâg-ı gamdan rûyu hûn-âlûdedir cismim gibi
Âşık olmuştur meger kim lâle-i Nu'mân aña

Yâr hecriyle Hayâlî şöyle mûnis oldu kim
Rûz-ı vuslat gibi olmuştur şeb-i hicrân aña