Oğluma tebrik Şiiri - Sevinc Arzulu

Bu gün sənin ad günün,
Təbrik edirəm,oğlum.
Gəlsin xoş sədan, ünün
Qurban gedərəm,oğlum.

Ana öz övladını.
Bağrına basmaq istər.
Əzizləyib adını,
Köksündən asmaq istər.

Bitib-tükənməyir ki,
Ananın arzuları.
Könül tikəmməyir ki.
Məhv etmə onu barı.

Necə safsan, təmizsən,
Batma kirə, çirkaba.
Sən hamıdan əzizsən,
And içirəm kitaba.

Gətirdim dünyaya mən,
Düz otuz beş il əzəl.
Çiçək açan çöl-çəmən,
Olmasın sarı xəzəl.

Qaçıbdır uyğularım.
Yuxu yoxdur gözümdə.
Artıbdır qayğılarım,
Sənsən söhbət-sözüm də.

Məndən uzaq olsan da,
Tək xoşbəxtlik dilərəm.
Könlüm sazaq olsa da,
Göz yaşımı silərəm.

Mənim könül qapımı.
Açıb içəri gir sən.
Qırma xəyal sapımı,
Yaşıl gözümdə pirsən.

Imkan eylə işindən,
Məni tənha qoyma sən.
Ana nəvazişindən,
Usanma sən, doyma sən..

Tale sənə pis günü,
Göstərməsin,əzizim.
Gör oğul düyününü,
Dalğalansın dənizin.

Yaşa qərinələri,
Qocal, yüz yaşıma dol.
Geridə qoy illəri,
Ailənlə xoşbəxt ol.