O günleri xatırlamaq Şiiri - Sevinc Arzulu

Elə bil ki yağı gəlir,
Həyatın son çağı gəlir
Bilsən necə ağır gəlir,
O günləri xatırlamaq.

Dünəninə sayğısıdır,
Bu gününə qayğısıdır.
Gözlərimin uyğusudur,
O günləri xatırlamaq.

Sarı saçın ağ dənidir,
Dağ başının sis, çənidir.
Ölənidir, itənidir,
O günləri xatırlamaq.

Göz önünə duman gələr,
Gözdən yağış uman gələr.
Fikrimə hər zaman gələr,
O günləri xatırlamaq.

Sədaqətin təntənəsi,
Səadətin ayaq səsi.
Şəhadətin son pilləsi,
O günləri xatırlamaq.