Nur baxışından Şiiri - Sevinc Arzulu

Xəyal göylərində ildırım çaxdı,
Işığı qəlbimi yandırıb yaxdı.
Sən elə boylandın, sən elə baxdın,
Gözlərim alışdı nur baxışından

Fərəh aşıb-daşdı, göy dəniz oldu.
Qələbə xəbəri müjdəmiz oldu.
Buludlu səmamız tər-təmiz oldu,
Ulduzlar sayrışdı gur yağışından.

Anlaya biləydin kaş ürəkləri,
Incidə bilməsin yaş ürəkləri.
Muğamat yumşaltdı daş ürəkləri,
Küsənlər barışdı Şur axışından.

Nənənin qucağı ipisti, yumşaq.
Nağılı dinləyər sakitcə uşaq.
Səmadan asılıb yeddi rəng qurşaq.
Istərsən min bəzək qur naxışından.
13.01.2022