Niye gelmisen Şiiri - Sevinc Arzulu

Çoxdandır görmürəm gül camalını,
Anlaya bilmirəm hal-əhvalını.
Titrəyən əlinlə yaşıl xalını,
Sərirsən önümə, niyə gəlmisən.

Lirik mahnıların yadı ovudub,
Deyən bəstələrin məni unudub.
Yaralı köksümü ovcumda tutub,
Boylannam dünümə, niyə gəlmisən.

Bitib aramızda olan məhəbbət,
Amma ki tutmayıb yerini nifrət.
Deyəsən yamanca qalmısan həsrət,
Səsimə-ünümə, niyə gəlmisən.

Sanırdın heç zaman qocalmayassan,
Mənimlə birlikdə ucalmayassan.
Bilirəm, açmağı bacarmayassan,
Bağlı düyünümə niyə gəlmisən.

Söz ilə qoyulub mənim təməlim,
Dillərdə dastandır gözəl əməlim.
Nə vaxtdı əlinə dəymirdi əlim,
Son vida günümə niyə gəlmisən.