Nem yaylıq Şiiri - Sevinc Arzulu

Yollar çınqıl-çınqıl döşənib qalıb,
İzlər qəlpə-qəlpə keçir sinəmdən.
Vüsal qorxusundan üşənib qalıb,
Sözlər körpə-körpə köçür sinəmdən.

Dolaşır ilhamım dar küçələri,
Özünə əbədi girov axtarır.
Köksümün üstündə qar gecələyir,
Gözlərim səhərlər qırov axtarır.

Havanı bürüyüb yanıq qoxusu,
Daha nəfəs belə almayıram mən.
Əgər olmasaydı qanun qorxusu,
Həsrəti öldürə bilərdim həmən.

Nə çaylar qovuşar, yollar birləşər,
Sanki təbiətin yatan vaxtıdır.
Nə gözlər görüşər, qollar birləşər
Hücranın vüsala çatan vaxtıdır.

Tez çək ayağını qəm oylağımdan,
Insafsız, göz yaşı nəyimə mənim.
Təpər də qalmayıb nəm yaylığımda,
Qorxuram libas tək geyinə məni.
26.04.2018