Neden Şiiri - Sevinc Arzulu

Fələk yenə ocaq çatıb, tonqal qurub içimdə,
Ürəyimi bişirir o, səngiyən köz üstündə.
Neçə rəngli tüstülərin hərəsi bir biçimdə,
Nədən mənə cəza verir bir haqsız söz üstündə.

Nədən belə qüssəliyəm, nədən bağrım şan-şandır,
Nədən mənim ağlar qəlbim qəm-qüssəyə nişandır.
Nədən xəstə, saf könlümü bir də salıb azara,
Nədən bu gün küskün ruhun beləcə pərişandır.

Bəlkə, gülüm,sanırsan ki səni unudaram mən,
Bircə qəmli musiqidən duyğularım coşandır.
Bu ilahi məhəbbəti ucuzmu tutaram mən,
Sevdiciyin nakam eşqə şeir-qəzəl qoşandır.