Nece yaşayarsan Şiiri - Sevinc Arzulu

Etmə mənə belə zülüm,
Açılmamış solar gülüm.
Yannam,qalar təkcə külüm,
Mənsiz necə yaşayarsan.

Qəm əlindən qaçıb getsəm,
Son nurumu saçıb getsəm.
Əbədilik uçub getsəm,
Mənsiz necə yaşayarsan.

Sakit axan Araz olsam,
Şaxta olsam,ayaz olsam.
Eşidilməz avaz olsam.
Mənsiz necə yaşayarsan.

Xəzri kimi yelə dönsəm,
İnildəyən telə dönsəm.
Axıb gedən selə dönsəm
Mənsiz necə yaşayarsan.

Dərddən bağlar dəstə,Sevinc
Cavan,boyu bəstə Sevinc.
Əgər düşsə xəstə Sevinc,
Mənsiz necə yaşayarsan.