Naxışla ömrümü Şiiri - Sevinc Arzulu

Sinəmdəki ürəkdən də qorxuram.
Arzudan da, diləkdən də qorxuram.
Yağışdan da, küləkdən də qorxuram,
Söz deməmiş gözlərimi oyan var.

Özgə ömür yaşayıram röyada,
Ayrılmıram şəkər dadlı xülyadan.
Bilirsənmi bu işıqlı dünyada
Məni sənsiz, səni mənsiz qoyan var.

Ətrafı gözaltı kədərlə süzüb,
Göz yaşın muncuq tək üzünə düzüb,
Qohumdan, tanışdan əlini üzüb,
Fikirləşmə həsrətindən doyan var.

Aşikardır vüsalın mərd olduğu,
Sənsizliyin çəkilməz dərd olduğu.
Uzaqdanca sezib namərd olduğun,
Ayrılığın maskasını soyan var.

Özüməcə sən bağışla ömrümü.
Döymə gülüm qar -yağışla ömrümü.
Nə olar ki gəl naxışla ömrümü,
Əlin altda neçə fırçan, boyan var.