Naleni, neynim Şiiri - Sevinc Arzulu

Çəkmə gəl sən məni belə dara, gül.
Sonda qismət oldun zalım xara, gül.
Könlümün başında bitib qara gül,
Al rəngli o gözəl laləni neynim.

Olacaq özümə qənim, göz yaşım,
Çiskinim, dumanım, çənim göz yaşım.
Gül üstə süzülər mənim göz yaşım.
Yuyacaq o parlaq jaləni, neynim.

Həyatın mənası uzaqda qaldı.
Şəklimiz əbədi bulaqda qaldı.
Əzizim, sədası qulaqda qaldı,
Unuda bilmirəm naləni, neynim.