Mürgüleyen xatireler Şiiri - Sevinc Arzulu

Gözdə qoyma diləyimi,
Sındırma qol-biləyimi.
Neçə yerdən ürəyimi,
Süngüləyən xatirələr.

Tapıb bəyaz, zərif dürrü,
Sanki əldə edib hürrü.
Gizlədiyim sözü-sirri,
Sərgiləyən xatirələr.

Uçurtma ilham pərimi,
Hər misra bir dərd dərimi.
Neçə-neçə şeirimi,
Dərgiləyən xatirələr.

Bir Günəşdir göydən baxan,
Ildırımdır. tez-tez çaxan.
Mənim təkin gah ağlağan,
Gah güləyən xatirələr.

Qəlbimdən keçəni duyub,
Vüsalın sözünə uyub.
Dəli könlümdə uyuyub,
Mürgüləyən xatirələr.