Muğayat ol. Şiiri - Sevinc Arzulu

Qoyub getdi sevdiklərim,
Doyub getdi sevdiklərim.
Heyf, getdi sevdiklərim
Fələk, artıq sən rahat ol.

Nə aşiqin canını üz,
Nə yoluna tikanlar düz.
Hazır olub gecə-gündüz,
Hər əmrimə farağat ol.

Şeytanın oduna yanan,
Iblisin adını anan.
Deyirəm ki dinə inan,
Demirəm ki xurafat ol.

Hicrana heç bacı olma,
Həsrətin baş tacı olma.
Könül sıxan acı olma,
Şirin-şəkər zarafat ol.

Sevda eşqə qalan şeydir,
Tənhalığa qalan şeydir.
Olub keçən yalan şeydir,
Dünya məndən muğayat ol.