Mirin Şiiri - Zandar Amari

Dilo rabe deka rabe
Rêya halê te xirabe
Rabe ji xewa bêhayî
Ji razanê tişt çênabe

Temen borî va mirin tê
Girî li wî halê te tê
Debara te va tunîne
Digel ecel çiqa zû tê

Xwe ne xapîn weha nabe
Dara xwezîyê şîn nabê
Tewekkûl qet weha nabe
Bi runiştîne çênabe

Kesê hatî ew her çûye
Li nav axê winda bûye
Tiştên xwe li dinê hiştî
Bi parçeyekî caw çûye

Kesê dewlemend û xîzan
Ji wan li dinê kes neman
Hişê xwe bide serê xwe
Kanî Musa kanî Haman

Çi bi kêf û çi xemreş be
Çi bi nasî çi bê nas be
Tu çawa be bila bibe
Ji mirinê xilas nabe

Te tam ji zarokî nekir
Te xêr ji vê dinê nekir
Va ciwanî çûyî barkir
Te tiştek ji wê fêm nekir

Hinek heval zûde çûyî
Rojên wan li dinê borî
Mirin dibê ku zû bûyî
Li hin zarokê nûbûyî

Dem nîne ji mirinê re
Kes nizanê kengî wê bê
Cih nîne ji mirinê re
Kes nizanê li ku wê bê

Temenê te va ye diçe
Bizane bê hedan biçe
Dawî poşmanî bê feyde
Nebê ku bi xwezî biçe

Rih û şaşik feyde nadê
Mal û milk xilasî nadê
Kirinê qenc her tim bike
Bilî wê tişt feyde nadê

Yê hatî vê kerwanserê
Bizanibe ku wê herê
Kî bê kurê kî kesî bê
Çi kesê hatî wê herê

Lewra ti kes lê nemayî
Çi nezan û çi zanayî
Şarezayî beredayî
Ha dawî ha seretayî

Mirin tê hemû deveran
Li xanî û li nav bircan
Li bin ax û li ezmanan
Li hindur û li kolanan