Mesela? Şiiri - Yorumlar

KLASİK ŞİİRİMİZDEN: Şeyh Galip

Ey dil ey dil niye bu rütbede pür gamsın sen

Gerçi virane isen genc-i mutalsamsın sen

Secde- ferma-yi melek zat-ı mükerremsin sen

Bildiğin gibi değil cümleden akvamsın sen

Ruhsun nefha-i Cibril ile tev’emsin sen

Sırr-ı Hak’sın mesel-i İsi-i Meryemsin sen



Hoşça bak zatına kim zübde-i alemsin sen

Merdüm-i dide-i ekvan olan ademsin sen



Merteben ayn-ı musemmadadır esma sanma

Merciin Halik-i eşyadadır eşya sanma

Gördüğün emr-i muhakkakları rü’ya sanma

Başkasın kendini suretle heyula sanma

Keşf ile sabit olan ma’niyi da’va sanma

Hakkına söylenen evsafı müdara sanma



Hoşça bak zatına kim zübde-i alemsin sen

Merdüm-i dide-i ekvan olan ademsin sen



İnleyip sırrını faşeyleme ağyara sakın

Düşme bilmezlik ile varta-i inkara sakın

Değmesün ahların kakül-i dil-dara sakın

Sonra Mansur gibi çıkman olur dara sakın

Arz-i acz etmeyesin yareden ol yara sakın

Bulduğun cevher-i alileri biçare sakın



Hoşça bak zatına kim zübde-i alemsin sen

Merdüm-i dide-i ekvan olan ademsin sen

Sendedir mahzen-i esrar-ı mahabbet sende

Sendedir ma’den-i envar-ı fütüvvet sende

Gizli gizli dahi vardır nice halet sende

Ma’rifet sende hüner sende hakikat sende

Nazar etsen yer ü gök duzah u cennet sende

Arş u kürsiyy ü melek sendedir elbet sende



Hoşça bak zatına kim zübde-i alemsin sen

Merdüm-i dide-i ekvan olan ademsin sen



Hayftır şah iken alemde geda olmayasın

Keder-alude-i ümmid u reca olmayasın

Vadi-i ye’se düşüp hiç ü heba olmayasın

Yanılıp reh-rev-i sahra-yı bela olmayasın

Ademe muttasıl ol ta ki cuda olmayasın

Secdeler eyle ki merdud-i Huda olmayasın



Hoşça bak zatına kim zübde-i alemsin sen

Merdüm-i dide-i ekvan olan ademsin sen



Berk-i hatıf gibi bu kayd-i sivadan güzer et

Erişen har u hasa ateş-i aşkı siper et

Damenin tutmaya asar-ı alayık hazer et

Şemş veş hahiş-i Munla ile azm-i sefer et

Saf kıl ayineni kabil-i aks-i suver et

Hele bir cem’-i havas eyle de Galib nazar et



Hoşça bak zatına kim zübde-i alemsin sen

Merdüm-i dide-i ekvan olan ademsin sen