Mene acı olanlar Şiiri - Sevinc Arzulu

Yarpaqlar yaşıl tökülər,
Dan yeri axşam sökülər.
Bəlkə sənə dadlı gələr,
Mənə acı olanlar.

Şərbətinə zəhər tökər,
Yol üstündə tikan əkər.
Bir gün ayağından çəkər,
Başın tacı olanlar.

Qoşulmaz insaf köçünə,
Baxmaz dünyanın heçinə.
Kef çəkərlər pul gücünə,
Saxta hacı olanlar.

Ünümüzü elə yayaq,
Ayrılığı düşmən sayaq.
Hər halıma dəstək, dayaq
Əsl bacı olanlar.

Göydən yerə hicran yağır,
Hər damlası yaman ağır.
Özüm kimi sadə, fağır,
Dərd əlacı olanlar.