Mehribanım Şiiri - Sevinc Arzulu

Qıyma rəngim sozalsın,
Ürəyimi söz alsın.
Qayıt geri, azalsın
Qoy çiskinim, dumanım.

Ay dilimin əzbəri,
Varmı məndən xəbərin.
Həmişəlik dön bəri,
Doğru çıxsın gümanım.

Tanrı bizə olsa yar,
Neynəyər ki xain xar.
Ikimiz də olaq var,
Məndən qayğı umanım.

Zaman yox özləməyə,
Könlümü közləməyə.
Daha yol gözləməyə,
Qalmayıb ki amanım.

Çiçək erkən solmasın,
Ləçəyin yel yolmasın
Mənlə işi olmasın,
Yorğun düşsün yamanım.

Sənin ürək oğrunam,
Həqiqətin, doğrunam.
Dünya qədər yorğunam,
Sən sonuncu limanım.

Aramızdan axmaz çay,
Tənha qoymaz ulduz, ay.
Sən Tanrıdan mənə pay,
Ay dinim, ay imanım.
Əzizim, mehribanım.