Mehdi Şiiri - Sevinc Arzulu

Çox zaman “Hə” dedik dadlı xülyaya,
Inandıq masmavi şirin röyaya.
Ah, nə tez göz yumdun fani dünyaya,
Bu dünya yalandan yalandı, Mehdi.

Tələbə oldun sən öz savadınla,
Qəlbləri şad etdin şirin dadınla.
Biz də fəxr eylədik sənin adınla,
Eh, şəklin bizlərə qalandı, Mehdi.

Heç yalan bilmədi o şirin dilin,
Təkcə Vətən idi ürək nisgilin.
O varlı, o gözəl Qubadlı elin,
Yağı işğal etdi.Talandı .Mehdi.

“Qələbə bizimdir”- Xalqım söylədi,
Xarı bülbülünü qəlbən iylədi.
Qırx dörd gün ərzində azad eylədi,
Ordum Qarabağı alandı, Mehdi.

Getdin, tənha qoydun dostu, sirdaşı,
Sənsiz yetim qaldı ömür yoldaşın.
Axdı bacıların acı göz yaşı,
Yağış tək torpağa calandı,Mehdi.

Jurnalistdi, qələmin itiydi çox,
Onsuz bu dünyanın dadı-tamı yox.
Nigaran baxışı qəlblərə bir ox,
Ayrılıq qəlbə qəm salandı, Mehdi.

Qardaşlar”Ah” çəkib, bacılar donub,
Üç gözəl balanın gözləri dolub.
Mərmər üzərinə şəklin həkk olub,
Uzaq xəyallara dalandı Mehdi.