Mavi yuxu Şiiri - Sevinc Arzulu

Yuxu gördüm bu gecə,
Səma tək mavi yuxu.
Xoşbəxt idim, ah, necə,
Dünyamda mavu qoxu.

Hər tərəf masmaviydi,
Ürəyimi açırdı.
Nağıltək, səmaviydi,
Qəm-qüssə yan qaçırdı.

Bol fərəh paylayırdı,
Dünyamıza bu yuxu.
Şənliyə haylayırdım,
Sağdı dostların çoxu.

Birlikdə rəqs eylədik,
Uşaqkən olduğu tək.
Şeir, nəğmə söylədik,
Sevincdən uçdu ürək.

Bizi qoynuna aldı,
Suyu mavi dənizim.
Vüsal nəğməsi çaldı,
Mehribanım, əzizim.

Əsrarəngiz yuxunun,
Ladı dodağımdadır.
O masmavi qoxunun,
Dadı damağımdadır.

Görməmişdim öncələr,
Bunca mavi sis, duman.
Mənə mavi gecələr,
Diləyin siz hər zaman.
31.12.2020.