Kürüm Şiiri - Sevinc Arzulu

Neçə gözəl anın olub,
Görənlər heyranın olub.
Çoxları mehmanın olub,
Qarışıb iz-izə, Kürüm.

Əvvəlki tək şən olaydım,
Dalğalarla tən olaydım.
Bir sən, bir də mən olaydım,
Qalaydıq biz-bizə, Kürüm.

Həm mülayim, həm də ki sərt,
Səndən keçməz bircə namərd,
Sən mənə dost,mənsə həmdərd,
Oturaq diz-dizə, Kürüm.

Həmişə şən,güləş olaq,
Səmada al günəş olaq.
Alovlanan atəş olaq,
Calansın köz-közə, Kürüm.

Baş açırıqmı halından,
Dünyanın qeylü-qalından.
Məst oluram vüsalından,
Gələndə göz-gözə, Kürüm.